'संजय गांधी व 'श्रावणबाळ' योजनेच्या मानधनाबाबत मोठा बदल, काय आहे नवा बदल?

 ज्याला कुणाचाही आधार नाही, वयोवृद्ध आहेत, अशा निराधार व्यक्तींना सन्मानाने जीवन जगता यावे यासाठी सरकारकडून विविध योजनांच्या माध्यमातून महिन्याकाठी ठरावीक मानधन अदा केले जाते. हे मानधन लाभार्थ्यांना तहसील स्तरावरून बँकेत पाठवून संबंधितांच्या खात्यात वर्ग करण्याची प्रक्रिया केली जाते. आता मात्र थेट ‘डीबीटी’मार्फत निराधार अनुदान लाभार्थ्यांच्या खात्यात वर्ग केले जाणार आहे. त्यासाठी आधारकार्ड अपडेट करून मोबाइल क्रमांक बँक खात्याला लिंक केलेला असावा. कागदपत्रांची पूर्तता लवकर पूर्ण करावी,’ असे आवाहन तहसीलदार डॉ. कृष्णा कानगुले यांनी केले आहे. 

‘संजय गांधी निराधार’ व ‘श्रावणबाळ’ योजनेच्या लाभासाठी यापूर्वी तहसीलकडून संबंधित बँकेत सर्व लाभार्थ्यांची यादी पाठवून त्यानुसार निधी दिला जात होता. तो निधी बँकेकडून संबंधित लाभार्थ्यांच्या खात्यात वर्ग केला जात होता. या प्रक्रियेस विलंब होत होता; तसेच वयोवृद्ध लाभार्थ्यांना अनुदानासाठी बँकेत फेऱ्या माराव्या लागत होत्या. मात्र, आता निराधारांचे अनुदान थेट डीबीटीमार्फत मिळणार असल्याने निराधारांची हेळसांड थांबून बँक कर्मचाऱ्यांची कसरतही थांबणार आहे.

या दोन्ही योजनांचा लाभ घेत असलेल्या पात्र निराधारांकडून आधारकार्ड आणि मोबाइल क्रमांक संकलित करण्याची प्रक्रिया सुरू करण्यात आली आहे. याबाबत गावस्तरावर तलाठ्यांना आवश्यक त्या सूचना देऊन संबंधितांना कळवले जात आहे. निराधार व्यक्तींना आता कागदपत्रे अपडेट करून घ्यावी लागतील. बहुतेक व्यक्तींना आधारकार्ड, बँक खात्याला मोबाइल क्रमांक लिंक करावा लागेल.

आधारकार्ड व मोबाइल क्रमांक देण्याच्या सूचना : श्रावणबाळ व संजय गांधी निराधार निवृत्तिवेतन योजनेचा लाभ घेत असलेल्या लाभार्थ्यांनी लवकरात लवकर आधारकार्ड व मोबाइल क्रमांक तलाठ्याकडे देण्याच्या सूचना देण्यात आल्या आहेत. आधारकार्ड व मोबाइल क्रमांक न देणारे लाभार्थी अनुदानापासून वंचित राहू शकतात.

 या कागदपत्रांची आवश्यकता : अनुदान ‘डीबीटी’मार्फत सरळ लाभार्थ्यांच्या खात्यात दिले जाणार असून, यासाठी हयातीचे प्रमाणपत्र, आधारकार्ड, बँकेचे पासबुक आणि बँकेला लिंक असलेला मोबाइल क्रमांक आवश्यक आहे.